黃秉華
乍看以為小編起錯題，殊不知，內裏有微言大義之處。
話說全球最暢銷的薄荷香口膠，在內地銷售暴跌，數字不重要，死因就值得研究，原來不是後生不愛嚼香口膠，而是電子支付太方便，一嘟搞掂，以往香口膠斥重資在全國超市收銀機旁邊擺個靚位，等那班排隊畀錢的人龍顧客上來，你知啦，等到不耐煩嘛，人手找贖，你話幾麻煩，如是者，排到上來，見到香口膠，馬上燃起「衝動消費」，根據市場數字，香口膠如此一擺，銷路竟可以增加20%，講都無人信，不過，我相信了。
事實上，返過來看，幾十年前沒有超級市場普及，大家去士多、米舖買日常東西，點解香口膠都是暢銷的？唔通五十、六十年代，真係「飛仔」多，個個都𡁻香口膠乎？余生也晚，無從考究，但係我曾經目睹兩個怪現象，真係就是一瞬之間決定生死︰一、智能手機推出，膠光菲林「瓜柴」；二、與此同時，「陪葬」的是黑膠唱片和CD。當然，依家又話菲林、黑膠敗部復活，但是已是恍如隔世，產品定位從「大眾」變成「小眾」，這不是「常用品」，而是靠「懷舊」產生新的消費。
2026年一年過了一半，中國在人工智能、晶片和軍事領域，一下子推翻了舊時世代，最大衝突是美國，「窮」得只剩下航天任務，可幸SpaceX上市了，氣勢如虹，美國順利搶先再次載人登月，超過中國的話，仲有得玩，否則就真如香口膠，嚼之無味啦。