曾智華
必須承認，我能力極度有限，但總有個心願，希望為香港飲食業帶來些微生氣。故此，發散所有為食鬼老友，一發現有好的食肆，火速通知。
小弟如今有一支二百多人的「為食大軍」，只要任何食肆出品高水準，必定拉隊幫襯。好的話，會重複又重複去，兼且去過的為食友會「細胞分裂」，各自再帶老友去。
這個方法，試驗兩年，好掂！
一個月前，素來尖嘴的為食師傅輝哥來電：「肥碌，有間小型懷舊西餐廳，我幫襯咗幾十年，位於西環，名『天樂』，女主人Amy及妹妹阿貞對食物好有要求，充滿誠意，主打豉油西餐。不過只坐三十多人，你試試佢啦！」
放下電話，即飛車去試試。喂喂，果然掂，尤其瑞士汁雞翼及炒牛河，久違了的童年味蕾記憶返晒嚟。煎法國鵝肝拼牛柳，也是強項。最驚喜，有多年冇機會再試的梳乎厘，試完，立即拉Amy傾包場。
上周五，三十幾隻50歲以上為食鬼開心爆，因個個恍似走入「美食時光隧道」，灌完紅酒、白酒，未夠喉者可再來杯紅豆冰。
在座的「班長和」突然大呻：「唉，如今的所謂肉絲炒麵，只是炸麵，冇癮……」
竟畀Amy聽到，二話不說，即請廚房大佬炒一碟出來，喂，水準頂頂頂級呀。
是晚快樂一浪接一浪，因小弟喜歡吃喝外，最愛八分酒意時Sing Along。故此早早約咗兩位上世紀八十年代得獎民歌手Johnny及Alex，在晚餐後熄燈，開咪大唱經典中外名曲。
兩位大師級人馬，乜歌都難唔到佢哋，The Beatles又得，關正傑又得，許冠傑都得，將現場氣氛推到上太空。
走前，感謝Amy，唔使講嘢，即再訂7月尾Encore。