正常國家，正常社會，正常機構，皆強調有規有矩，暗地裏雖然未必，但明的，多會「扮」大公無私。
但今天的世界唔同玩法，例如狂特，明益自己及家人，食相難看！北韓「肥仔金」，成日帶住個肥女兒，頻頻出席公事場合，都唔知佢用乜身份可擁有如此特權。
當權就可以任性，肆意橫行？咁巨富又如何？論冇規冇矩，表表者為美國首富馬斯克，離晒大譜，經常帶住個6歲仔亂闖，視禮節如無物。公式宴會出入人民大會堂如是，到白宮總統辦公室商討公事如是，完全唔講禮數。大家試想想，若個個有權或有財者皆變冇王管，成個世界會變成點？這種特權，必須喝止！
講到父親與兒子，大部分人都會將希望投射在下一代，尤其自覺是成功者，更希望兒子跟隨自己的成功步伐，或許，包括香港首富誠哥。
三十年前，李澤楷由外國回港發展，小弟約咗佢做直播節目《清談一點鐘》，當中詳述父親對佢童年成長的影響。真是幼承庭訓，當年澤鉅與澤楷只得幾歲，誠哥每每與其他富豪或管理高層開會，都會安排兩兄弟坐在會議室一角聽當中的討論。試想想，不停在如此「高章」的會議中浸淫，耳濡目染下，兩人的思維、識見與視野，怎不大幅彈離同期的青少年？
講到誠哥生意智慧，楷仔回憶當中秘訣——永不賺盡，留空間畀對手賺，如此，才會長做長有，個個都希望與你合作。反之，若一合作就要賺盡的話，很可能就只一次。誠哥「唔賺盡」的策略，大家都有機會見識到，不過，佢的「唔賺盡」，若你儍吓儍吓唔領會，賺完少少水尾都唔識走，咁就……
最著名是「中環中心的教訓」！ Got it？