曾智華
未解釋今日標題前，先講本欄周三貼士，小弟高調指「告東尼大舉出擊格局」，再符符碌碌撞中。告仔殺二W二Q，再𡁻埋練馬師王，肥到著唔到襪。
跟我貼士買的，也不辱命，雖熱熱哋，但「財將」話明W，拖「太子」Q有87.5元，二重派135元，夠食及第粥、油條消夜喇。希望再接再厲，齊齊分馬會錢。
好，回歸今日大標題。有投注足球者一睇，可能會嘴藐藐指：「三十倍『客勝』會贏？好似未聽過喎，咪作大！」
冇作大，珍珠冇咁真！
話說世界盃開波前，N咁多場熱身賽，呢種賽事當然唔會「真打」，純屬熱吓身，試吓陣，又或「搵吓食」。既然輸贏冇所謂，仲唔「搵食」？故此，呢類賽事，我會場場買十蚊主客和中較冷的兩瓣，總結經驗——有得執。
周二如常，下午兩點半熱身賽日本女足對南非女足，操盤手可能以為南非贏乃天方夜譚，零機會，即有如跑馬若出隻跛嘅，當然九十九倍。結果，操盤手開出南非女足贏為三十倍，嘩，真係夢幻到爆。小弟如常買十蚊，一箸夾中南非「客勝」，笑到碌咗落地。
這種經驗必須分享，唔可以收埋食。
好，又分析今日賽事，一於拆第八場二班千六米個局。
一號「睿盛人生」由伍廄拉過方廄，立即回跑最拿手的千六米，曾四出此程兩W一第四，配「真騎」會好神的布文，方仔為爭冠軍，有機會「爆樽」。
二號「太陽勇士」排二檔用十磅女袁幸堯，有權一放絕塵，追死其他馬。
三號「包裝福星」，睇款似潘頓撬馬成功，因W過的班德禮冇份騎，慘情。
五號的「勁沙塵」今季跑十次，四W一Q四P，勁準繩。
以上四匹，Q及二重彩穿勻啦。