曾智華
「爆粗校長」李卓興自言驚訝及遺憾，因之前諗住誠意道歉兼主動請辭，事件應該謝幕。點知唔係，係——唔准辭職，必須炒魷！
這宗個案，小弟去到任何飯局，仍有不少人討論，個別人士認為：「大佬呀，講句粗口啫，使唔使連人哋事業前途都全部摧毁呀？喺香港，你行出街，有邊個角落冇人講緊粗口㗎？根本係普及文化。就算入到中學大學，也一樣啦。碌Sir，你做過電台、電視台，班Crew出外景，有幾多個唔講粗口？尤其武術指導、龍虎武師，更加XYZ不離口啦，你見最近鼎爺連接受訪問，都MM聲啦！」
以上言論，可能代表部分人睇法，事實，今天全世界道德觀在不停下沉，尤其出咗個粗口爛舌美國總統，更搞到「語言大混亂」，連電視新聞都要「嘟」佢講嘢，實在奇技大觀，唔知美國人，尤其老師及牧師點睇？
講返爆粗，大家心照，已經是一個相當普及的市井文化。但文化還文化，是否可以如此、應該如此，又當別論。
一個社會，一個行業，一間機構，必須有一套人人皆需遵守的準則，才可正常運作，否則必定世界大亂。
不少專業，都有紅線，一過，即「死」。
昨晚有位老差骨指出：「例如做警察，經常陀槍在身，你能否因畀人激到怒火中燒，就拔槍砰過去？勿講開槍，連拔槍都唔得，要寫詳盡報告解釋！碌Sir，就似你哋做電台直播，可否被聽眾搞到㷫晒，就開咪問候對方祖宗十八代？當然唔得！」
對！其實每個成年人，基本處事有其自由，但必須衡量身份、環境、時間、規矩、法律……否則，就要承受結果。李卓興爆粗時是身為校長身份及在學生面前，當然應該炒魷！