曾智華
過去兩周不少老友問：「碌Sir，睇咗《諾曼第風暴》未呀？好鬼正喎！」
事實，我對美國的戰爭片，由幾十年前極度瘋狂，已經由熱轉冷。先講六十年前，老一輩影迷必定睇過《六壯士》，受薰陶下，對格力哥利柏等一類「熱血正義」英雄，無不衷心崇拜。不過，人，隨著見到真真實實的一切，自會成熟，會懂分析，會辨是非。
小弟上世紀七十年代也睇過N套荷里活反戰電影，再加上留學美國時，認識大批斷手斷腳的退役軍人同學，聽到作為美國「戰爭機器」的第一身經歷與感受，理所當然，對美國佬多年來不停打呢個、打嗰個，開始極度惡心。
尤其近日，又不經聯合國，粗暴出兵濫炸伊朗（結果自陷泥沼，令國內的反戰情緒高漲），有說不出的討厭感覺。故此，一見美國製作的戰爭片，直覺就是——又合理化自己的霸權行為？
幸而喺N咁多老友游說下，又睇睇此片究竟講乜。了解後，好，入場。
此片為一個真實故事，絕對非一般的美國歌頌自己的戰爭電影，而是描述1944年希特拉與盟軍一次極重要戰役——諾曼第登陸戰。
這場戰役的成敗，對全球實力分布具極深遠影響，若盟軍登陸失敗，除死上千千萬萬士兵外，更慘烈，有不少國家將被吞掉，在地球上消失！
盟軍總指揮艾森豪將軍由班頓費沙飾演，佢肯定是當今世上演技最勁揪的影帝級演員，由頭帶到尾，將電影內所有老戲骨比下去。
此片導演在操控氣氛方面，拿揑精準，以一場又一場衝突，將觀眾情緒推到高峰。另外，編劇也應記一功，因對白字字珠璣，充滿濃濃的張力與煽動力。
總結，此乃一套任何影迷必須看的精彩電影。