(曾智華)
邊個係「符碌」？我囉！點解會明益旅行社？
慢慢拆解！
真係抵畀老婆大人不時窒㗎：「你呀，成日扮英明神武，懶叻，其實係豬頭炳。」近期尤其中到開巷，先係唔見咗個銀包，繼而……唉，咁都中招。
話說上星期日（5月31日）與二十位老友過珠海食好嘢，入住五星海灣酒店，大隊翌日走，我決定6月1日留低Hea多一日。基於海灣酒店在半山，出入不便，打算翌晚轉酒店，轉到山腳的希爾頓歡朋酒店。易，立即篤篤篤上網訂，火速信用卡過數，收埋Confirmation。
一個鐘頭後才醒起，哎呀，弊，原來剛剛訂房時冇選日子，如此，酒店網自動以為我訂5月31日入，6月1日出。
一日都係自己大懵，錯晒，點搞？立即去電永安旅遊客戶服務熱線。
真係講都冇人信，慘過以前「想Cut有線合約」，電話完全冇人接聽。二十多分鐘後仍只不停播音樂，真係畀佢吹到啤啤脹。
點搞？好，試試飛奔去希爾頓歡朋酒店，展示訂房單，懇求接待姐姐將入住延一日。
「唔得喎先生，我哋幫你唔到！（可否請你主管出來商量一下？）我就是主管譚雯庭！」
吓，原來咁大間酒店，只有一個前台職員，正是主管。「咁啦，你試試同攜程講啦，永安旅遊母公司正是攜程。」
事情至此，回心一諗，算啦，搞到成身汗，四百幾蚊啫，一於舉手投降。
成件事，擺明我「符碌」訂錯日子（未入住喎，有冇機制延期㗎？），責任自負。
唯一少少㷫，點解永安旅遊客戶服務冇「服務」？條熱線等到天長地久都冇人接，既然廢廢哋，咁不如當佢係「盲腸」，Cut鬼咗佢算，免客人有False Hope。