黃秉華
我童年時睇電視直播，見證美國創造首次載人登月創舉，不知是否母親望子成龍，升中新開學那一年，她送我一個「紅A」推出的爆紅產品——太空喼。時隔幾個十年，香港真係有太空人喎，不過唔係我，而是一位陀槍師姐。
中美太空爭霸戰揭開序幕，上周的「神舟二十三號」不單只是把太空人送到天宮空間站，更被美國太空總署NASA視為挑戰——美國阿提米絲二號（Artemis II）4月成功將一組四名太空人送往月球表面，完成繞月任務——不過，科學界人士認為，中國才是下一個人類登月國家，即是話，中國太空計劃後來居上。
輸人唔輸陣，早前NASA宣布耗資二百億美元，定於2032年前在月球南極建立永久基地。NASA聲言「美國不會放棄月球」，言辭好挑機。
聽講話，中國第一位太空人楊利偉是配戴手槍上太空。我諗，以後中國太空人「陀槍」要成為例行裝備，事關分分鐘中美太空人會在月球相遇。美國精神源自西部牛仔拓荒，美國先輩們當年在美洲「任我行」，同原住民矛盾甚深，「有乜依郁」唔係「揸定碌竹」，而是用槍解決問題。
NASA前局長也是太空人出身，名叫Bill Nelson，在任時周圍呼籲各國友好防範中國，佢話擔心中國有一朝如是說：「月球是中國的了，你們別過來。」恕我多心，咁係咪美國人間接指出「月球其實屬於美國」，吓哇。
唔好拗，莫信直中直，須防仁不仁，講道理不如有「真理」在手，真係穩陣啲噃。