哈哈，周三晚「軟硬鞭」果然一W收工，留返明日做大騷！
先講今晚深夜，全球好多人唔會瞓㗎啦，點解？因個個個心飛晒去匈牙利，享受每年一度最精彩的足球賽——歐聯決賽！
點解最精彩？資深球迷必定認同，二十年前開始，世界盃已淪為二級球賽，認真程度及球賽質素，已遠在歐聯、歐霸及英超之下。
原因不難理解，因足球乃一盤天文數字生意，涉及巨額金錢。有錢的地方，可以買到最頂級的球員效力，於是，全球天才皆聚集在歐洲，尤其英國、西班牙、德國及法國。
每個國家的足總，為賺到盡，紛紛度出五花八門的比賽。例如英國，英超之外，又有英格蘭足總盃、英格蘭足球聯賽盃、英格蘭社區盾。出色的前領球隊，更要應付歐聯或歐霸，所有頂級球星，每年由8月到翌年5月頻密出賽，怎不打到又傷又殘，甚至厭戰？
以前打世界盃，是為國家光榮，但近年的球星，為確保自己在所屬球會獲取最高收入，當然不想在太公波中受傷，故此，個別戰意麻麻。
更重要，賭博之風席捲全球，合法與非法賭博，涉及深不可測的驚人注碼，故此，收入較低的球員，很難不受引誘。
種種原因下，世界盃這些太公波，無論怎樣宣傳催谷，也難與「真正打甩髀」的歐聯比較。
歐聯是集名與利於一身的賽事，去到尾，冇人會咁蠢打假波。有如賽馬，跑一級大賽，獎金之高，絕對令騎師搵命搏，你睇睇「遮打盃」麥道朗點跑就知。
今晚歐聯決賽，感情因素，相信八成人會捧阿仙奴。我又如何？少少哋買十蚊和，以及十蚊入球細。因去到決賽，大家都不輕易出招，只等對手露出一次死穴，才會閃電狂刺望封喉。