黃秉華
中國有個真正朋友的確好極。「你講美國總統特朗普？」唔係！同窗茶敘，我趁大家食蓮蓉包之空隙，上網完成一筆超過四百港元的交易。話說馬斯克隨白宮天團訪華，在人民大會堂使出看家本領，直教蘋果老大庫克、英偉達老闆黃仁勳比下去。
「唓，全世界都知啦。」唓？你係助語詞定係講馬斯克賣嘅車？「梗係6歲大的小馬斯克，佢一出場以淺藍灰色中式馬甲、橫掛一個虎頭公仔包，搶晒在座各位鏡頭。」啱，你見多識廣，真係零舍不同。
我剛才就是興起，上網預訂這個廣西原創品牌「芽小七手創」虎頭包，據聞要等到7月先有貨。買嚟做乜？當然係送畀小朋友，唔通我拎出街呀？
馬斯克今次百分百會「父憑子貴」咯，此君趁機在場公開用中文宣布︰「我的兒子正在學習普通話。」嘩，邊個夠佢撈？黃仁勳話時話係華裔，但佢對國潮缺乏細緻的感覺，之前在內地曝光一段「穿東北大花衣」的照片和影片，真係「驚嚇」兼且「趕客」。
「飲啖茶先啦，唔好成日挖苦人啦。」咁，我不如轉個話題，講吓「真正朋友」之道，嗱，能夠一而再、再而三，帶挈你搵到真銀，就真係好到不得了的朋友嘛。上次，馬斯克因為本身產能問題交唔到貨，索性來到上海開廠，結果皆大歡喜，吓哇。今次又如何？今次帶挈中國風衝出亞洲，可望直搗巴黎、米蘭、紐約，呢筆文化產業你話值幾多錢？「明解！明解！」