「A姐」係邊個？正是剛被委以重任的新城廣播首席營運總監兼總編輯郭艷明！
周一下午手機爆炸，N咁多探子瘋傳：「碌Sir，新城馬仔劈炮呀，上任CEO不足一年就唔撈，你知唔知有乜內情呀？」
我雖離開廣播圈十五年，但對昔日同業的一切，仍非常關心（其實八卦），新城台成立之後，真是有如羅文名曲《幾許風雨》，都唔知換過幾多人，似乎個個都做唔長，絕少捱到退休就拜拜，當中個別更爆出極Juicy新聞，長期成為娛樂版頭條。
去年馬浚偉上場，立即宣布多項改革，滿肚鴻圖大計，最近並率隊北上談合作。
點知……又係做唔長，兼且閃電式話唔撈即唔撈？
呢頭公布佢辭職，公關通告立即同時宣布郭艷明幾乎孭晒所有工作，職銜是首席營運總監兼總編輯，負責做乜？嘩，真真一腳踢，睇落都幾驚人，包括管理節目製作及新聞部編輯之外，大件事，連日常營運及銷售工作，也要殺埋，即係點？即係負責孭數！
做總編輯兼孭埋數，是否有點角色衝突呢？不過咁，A姐在傳媒行已經四十八年，冇乜邊個廣播機構及重要崗位未做過，相信冇乜可以難到呢位「千手觀音」。
速速去電恭喜，佢笑笑口說：「阿碌，咪玩我啦，實在我是『鍾無艷』，這角色，過去近五十年不斷演完又演啊！」
乜係鍾無艷？上世紀六十年代粵語殘片，不時有這個人物彈出彈入，但近三十、四十年好似唔多見啦，年輕讀者想知係乜，問問AI啦。
好嘞，究竟馬仔搞乜鬼呢？此刻冇人知，是否有難言之隱，唔即刻走唔得，定係有更重要「政治工作」，要佢即上馬呢？若如此，相比之下，當然新城台個CEO位唔使留戀了。