(曾智華)
早年因工作拼搏過度，故此，上世紀九十年代中已開始被「身體抗議」，慢慢搞出幾種長期病患，先而精神系統，繼而心臟，再來眼中風，加埋必須的牙科，一年車車轉出入公立醫院覆診。
三十年下來，見盡不少官家醫生，真係乜人都有，觀察佢哋覆診時的態度、表情及積極性（也有消極的），已是一種「樂趣」。
有兩種極端，有的完全唔理出面幾多人排隊等，一於輕攏慢撚，同你閒話家常。
試過一次，小弟仿似做咗對方心理及理財顧問。醫生三扒兩撥睇完報告後，開始呻，包括呻醫管局制度，呻悶，呻人生⋯⋯再呻唔識理財，叫我教吓佢，真係笑到碌地。
間中有表明是電台聽迷及報章讀者，長期追捧，突然見真人現身，覺得不可思議。
當然，最多是機械式專業，「渣渣淋」走過程序，請你再約期，就撳掣——下一位。
上周又到覆診期，今次破晒紀錄！破乜紀錄？最快紀錄！老套形容詞——快過打針。
經常有病友抱怨，等就等三個鐘，見就見三分鐘，醫生仲望都唔望我。若你是公立醫院常客，係咪好有同感呢？
我今次經歷，中到應晒。基於公立醫院冇得揀醫生，故此，可能次次去都不同人。
今次呢，揚聲器嗌：「曾智華，十九號房！」
立即彈起推門入內，先是慣性操作，將覆診單遞畀面前的「醫生仔」（目測二十多歲），佢望望，然後改望電腦，大家開始零眼神接觸的對話。
「退休後有冇做嘢？」（答：冇全職，只寫嘢。）
「有冇做運動？」（答：有。）
「想唔想減藥？」（答：唔想。）
「有冇唔舒服？」（答：冇。）
「好，咁下年再嚟啦！」
各位，似唔似同AI對話呢？全程三分鐘。等三個鐘，見三分鐘。