男人大丈夫，畀老婆窒、畀老婆鬧，乃似閒話家常，日日都會發生，大家毋須認真，更毋須上心，一於嬉皮笑臉，當佢唱歌就算。全世界老婆十之八九如是，鬧老公根本唔使講理由、講邏輯的，九成精靈小丈夫應該心領，剩返一成，竟然能相敬如賓的，多數有「說不出的原因」。
老婆大人搞乜窒我蠢呢？因為一套電影《寒戰1994》！
《寒戰》系列，一及二皆睇過，正，劇力無窮，尤其梁家輝個「關公」造型，夠晒絕，一見難忘，氣場逼人。有咗前科，再來套《寒戰1994》，當然飛身入場啦。心諗，幕後班底既然一樣，理應承接頭兩部氣勢，加上卡士不俗，當然充滿期望。
點知⋯⋯嗱，若我話佢低質素，必畀人噓死，也可能不公平，但小弟點都冇辦法話此片精彩，作出推薦。
一邊睇，一邊心諗，究竟編劇想表達乜呢？橋段有啲無厘頭，尤其我輩在傳媒工作半世紀，識盡也見盡各路人物（左中右黑白、富豪及政壇），好難接受編劇的天馬行空大話西遊，尤其描述到幾乎逢人都奸，全部爾虞我詐，冇個正派，太脫離現實了。總之，編導就是將劇中人物性格、心態及劇情發展扭呀扭，扭到天旋地轉而未見隧道盡頭，仿似拍拍吓有點失控。
其實片內演員全部「戲骨」，有戲畀佢哋演，一定交到貨。結果，此片雖是「滿天星」，但真正似早前兩部《寒戰》中的梁家輝及郭富城般耀眼者，一個都冇，連孭重飛的演技高手謝君豪，也難令人順服佢是能與所有權力中心人物抗衡的大孖沙（你見過早年的匯豐及怡和大班嗎？）。
回家向老婆呻：「都唔知套戲想講乜！」
就咁，畀佢一句噴過來：「唔明係你蠢啫！」