自由社會，自由看法，自由言論，大家觀點、角度不同，自有不同判斷，絕對正常又健康。
早前小弟認為今屆冠軍練馬師之爭，應只得兩位，方嘉柏及廖康銘。
專欄出街，立即收到不少馬友來訊反對，認為我忽略咗沈集成及希斯的雄厚實力，相當「不智」，因兩個馬房未用盡的子彈仍有不少，季尾衝線時，會逐一安排亮相，必須拭目。
事實，四大練馬師纏鬥至今，只兩場上落，一個賽馬日已可變天。
縱觀各馬房子彈，仍以方仔秤先，佢有七十匹馬，有部分明顯根本未用或未用盡。
其次，對，沈集成不可輕視，因四大馬房中，以出擊準繩計，佢最勁。出馬總數391次，已贏49次，遠超三大對手。形勢將不斷變化，真好玩！
明日方廄主帥「拉叔」缺陣，對手會否乘機發難呢？絕對有此可能。
集中研究三級賽「皇太后紀念盃」，七匹馬報名，六匹將有獎金，分分鐘出嚟遊吓馬河都大豐收。點解？因跑二千四百米，香港冇乜馬有此氣量，參賽的，全部欠缺此程往績，可能最後鬥爬返嚟，邊隻最先腳軟就包尾冇獎金。
級制賽，當然捧老薑騎師，因心理質素穩定，再加陣上經驗及留放功力平均贏晒。
計晒所有條件，只捧一個布文可也。此君在澳洲時乜大賽都贏勻，來到香港跑，有多少「退休前養生」的感覺，平時保留體力，只擇肥而食，例如打吡大賽及國際一級賽，因贏一場可以唞幾日。早前贏「祝願」及「白鷺金剛」，已經肥過豬仔包，獎金有排都食唔完。
明日三級賽，「哈囉文」選騎「君子傳承」，唔使度嘞，一於用佢做二重彩複式膽，拖「春風萬里」、「海上大軍」及「火焰閃爍」，坐定定等收錢啦。