(曾智華)
自從AI面世後，網上一片大混亂，尤其乜都可以真嘅一樣（即係假），總之假假真真，極之難分。
同時也有萬千「KOL」（點解要用引號？因個個都可以被形容為KOL，令這稱號大貶，因當中十之八九為流嘢），不過，有料、無料都好，總之全部作到個標題有咁煽情得咁煽情，目標只得一個，引你撳入去，睇一秒都好，如此，即成為流量。
每日我都會用兩小時左右瀏覽網上平台，有幾個慣性又有料到的，優先收看。其他，覺得標題吸引，好，反正免費，又𥄫𥄫。
近日比較喜歡的網上分析，個別百分百AI生成，包括「股神」巴菲特、「股聖」芒格及美國前總統克林頓，後者出得最密，一日可以有兩條二十多三十分鐘的分析。
介紹老友睇，十之七八反應：「喂，AI片嚟啫，有乜好睇？」
其實佢哋個個「失焦」（Miss the focus），我介紹大家睇，絕無話佢真係克林頓（事實係唔知），最重要，呢位「克林頓」完全化身真的克林頓，將昔日坐在白宮時如何有理有節，對內對外指揮一切的思維與邏輯，簡潔有力地鋪陳，非常有深度，也有教育意義。
佢為民主黨前總統，但並冇意氣用事指責共和黨，尤其對現今總統特朗普的作風，只冷靜一步步地拆解「侵侵」上任後決策，對國內政局及民生、對國外尤其與盟友的關係，造成咗乜嘢變化，而種種變化，又將令今日及以後的美國，步入一個甚麼局面。
一邊睇，你一邊會開竅，原來高層次的政治人物，對管治世界第一強國，視野是這樣的。相比其他網台嘈喧巴閉、只講立場不講道理的「KOL」，高太多班了。誠意推薦「克林頓頻道」。