曾智華
今日標題，為乜賽事兩字要加引號？騎騎，心照啦，因呢場正是新丁女騎師袁幸堯贏的第一場馬，冇嘅，小弟覺得唔多似「賽事」囉。
睇派彩，已有極大顯示，老友，新人贏馬，W只得24元、Q28元、二重彩54元，是否熱到唔似真？很可能是「幕後派錢」啩。
我再三翻睇巡邏影片，發覺陣上騎師全部識做，出閘後，護送袁小妹責任交畀跑第二的田泰安及第三的黃寶妮，其他騎師睇風景，入晒直路，保證「劇本」完成，才扮推幾推，如此，一場冇錢分又皆大歡喜「賽事」完成，你有冇大叫Yeah呢？
當日小弟預先張揚，乜都唔刨，所有袁小妹坐騎10蚊雞WP，共100大元投注，場場睇佢點跑。
鬥志唔差，一W看似有劇本外，其他兩隻P都算有板有眼，在冇乜激烈拼搏下（冇人會撞到佢嘅），順利入P。我的100蚊捧場費，收返82.5元，付出17.5元賀佢初次登場，絕對值。
今次之後，再冇「劇本賽」㗎喇，努力呀。
講到十磅仔女騎師，我覺得黃寶妮師傅賀賢唔多對路，當晚出七隻「白果馬」，全部機會普通，點解一隻都唔畀徒弟騎呢？反而告東尼彈咗隻十倍馬比小妮子贏。老友，若你是黃寶妮，師傅咁對你，心情會點？
今日二級「短途錦標」，馬會又再派錢，因「嘉應高昇」參賽，WP冇走雞，熱爆都要派彩。買10蚊，W賺5毫，P賺一毫，你要唔要？原則上，若贏硬當然要，此乃投資或投注的鐵律。
我最想睇「主席錦標」邊隻W，因潘頓寧選「舉步生風」而放手「遨遊氣泡」。
小弟純支持華人一哥周俊樂，佢執到好馬，必定搏命，望今場鍊低成日蠱蠱惑惑的「軟硬鞭」！