曾智華
今日標題主角係邊個？一名大快活長壽醫生！
人越大，越容易分類，尤其在對健康方面，一樣米養百樣人，當中小弟肯定認識七、八十種。
最極端的兩種，一為乜都驚青，乜都唔敢食、唔敢飲，成日記住卡路里糖分鹽分乜乜物物指數；最麻煩更乜都話有菌，不但全日二十四小時（除咗飲食）都戴住口罩，食飯更自備餐具，全部用火酒抹完又抹。
乜都驚本來唔關人事，最冇癮是每次飯局，由點菜到見到人哋食乜飲乜都不停勸，搞到老友個個煩到抽筋，雖無反面，但慢慢逐一彈開，有默契凡飯局，可免則免唔搵佢。
根據小弟觀察，呢類人不特別健康長壽，反之疑神疑鬼乜都擔心，除開心老友少外，個人心理影響生理，免疫力多比別人弱得多。
好嘞，另一極端係乜？正是該死唔使病信徒，乜都食，乜都飲，從不戒口，更勁，從不驗身，除非出咗警號。
你咪以為闊佬懶理麻甩族才會咁，靜靜話你知，醫生都會咁㗎。我當然唔會開名，但認識的醫生中，個別（不少）見病人時，當然扮演醫生角色，跟足教材忠告病人定時驗身勤運動，嚴控三高，不煙不酒早睡早起……
好笑在，講完，咁佢哋自己又有冇做？一如教師、牧師，角色永遠是個良好人辦，一切普通人惡習都不會染上，清心寡欲規行矩步，老友，你話會否如此？在學生及信眾面前當然如此啦。
醫生平日忙到飛起，唔錯得，工作壓力極大。離開醫院仲唔大吃大喝，放縱一下？喂！人嚟㗎！
總之，毋須驚奇，在社會中你我皆有角色，扮演時，當然應該盡心盡力做好，但放工後，請互相尊重對方的自由。
今晚我又同「快樂傳媒老是佛」出動喇！