「唔好啦，我唔想做訪問啊！」
「我唔想曝光啊！」
「我得一個人一對手，頂唔順㗎啦！」
「我唔想請人幫手呀，教得嚟，不如自己做仲快啦，請人又要管人，唉……」
以上，邊個講的呢？正是近日爆紅，門口經常有條小小人龍的土瓜灣「上海美食之家」老闆娘梁太。
本欄讀者應該記得，小弟去年介紹過炮仗街三十八號新開的上海小店。話佢新開，其實不太正確，因此店在江西街已多年，靈魂人物梁太當時成間舖一腳踢，又買料又做準備又煮N咁多嘢，還要包水餃、雲吞、抄手、炒小菜，收舖做埋清潔，只請一個阿姐幫手，做到人都癲。
更大重擔是丈夫梁先生患上失智症，要每日去中心接送，而女兒智障，也是每日接送往特殊人士工場。作為老友，我再三勸佢頂咗間舖，好好休息，因見佢開始有多少捱壞跡象。
終於兩年前梁太真的頂唔順，計過基本生活費早儲夠，好，投降！
但梁太出品的確高質，附近也有不少粉絲，碰口碰面都想佢重出江湖。休息一大輪之後，終於技癢，再細細哋租下幾十呎舖，只做雲吞、水餃、抄手及酸辣湯外賣。
不久之前推出粢飯，哈，毫無心理準備之下，竟然一炮而紅，網上一傳十，十傳百，人人蜂擁而去，指定要食粢飯。老友，一對手做得幾多？
幸而客人有耐性，你慢慢做，我慢慢等，排隊。
很快網上飲食平台又殺到，要求訪問。前日梁太見到我，又呻頂唔順，講咗本文開頭大堆說話。
本來守得雲開見排隊，絕對值得慶幸，不過，似乎梁太捱吓捱吓，又開始落落哋形啦，一個女人仔咁捱法，點搞？算係一個Happy Problem嗎？