曾智華
真係唔多敢信，周二本欄簡簡單單一篇《每個行業都是專業》，竟似一雷天下響。
發生乜事？起因是我家主人房鋁窗日久失修，前排十號風球全面滲水，搞到牆角發霉，地板當災翹起，冇得唔大裝修。
小弟雖人脈縱橫，但裝修呢瓣，則冇乜老友，屋苑做慣的師傅也忙到甩轆，十問九唔應（根本唔覆電話及WhatsApp）。
剛剛家中肥女兒上月裝修完畢，效果幾好，原來老闆仔「太子」為昔日加拿大多倫多大學同學，作風踏實，也交足貨。
睇過效果手工，小弟豪氣地話：「唔使打價喇，話我知幾錢，OK就開工啦！」
唔打價？是否聽落好老襯？錯！你搵幾個裝修判頭打價，然後價低者得，多會唔慌好嘢。我的作風，你話個總價我知，唔使分項，合理就開波，重要是咪玩蠱惑，做做吓詐型，又加呢樣嗰樣就得嘞。
我與「太子」見一次面，覺得可信，交晒畀佢。果然，裝修師傅手工唔錯，罕有地（裝修過者必知）在指定日子前完工。
小弟將經歷周二在此透露，再將專欄放上有十二萬幾追蹤者的Facebook。嘩嘩，難以置信，幾小時內已有百計親友、舊同學、舊同事「求救」，網上留言版更非常誇張洶湧，想知「太子」聯絡方法。
咁情況，當然唔答得，一間小公司突然幾百單裝修湧去，想唔冧檔都幾難。
但呢個故事教訓——邊個話裝修冇得做？又或香港冇乜生意好做？講的人，請老老實實由學做判頭開始，外面有幾十至上百億錢等緊你賺啊！只可惜呢行蛇蟲鼠蟻太多，壞晒風氣。
至於「太子」，我會先介紹一些好客（唔會腌尖腥悶或不停鍊價）老友畀佢，逐步再建立龐大裝修生意網絡啦。