撰文∣娛樂組 攝影∣朱偉彥
現年51歲、組合「廿四味」成員之一的李凱賢（Brian），近日因為在網台節目中分享美食，大讚銅鑼灣南華會的「甘棠燒鵝」時，爆出「Hermès版叉燒」、「Birkin bag嘅叉燒」、「燒鵝都dope」、「要着兩條褲」等一系列金句，瞬間人氣急升，意外成為新一代潮語教父，加上其「貼地」的粗口風格，大受網民歡迎。Brian坦言自己一直只是做回真實的一面，從沒想過會一夜爆紅，更認為粗口本身就是廣東話文化的一部分。雖然平日說話豪邁、粗口滿天飛，但他強調從不會用粗口責罵女兒。對於人生，Brian更相信一切早已由上天編寫好，不必想太多。
對於突然人氣爆升，獲不少網民關注，Brian卻淡然表示：「我一路都做返自己，做人最緊要真，我覺得這個是吸引到人喜歡。我咁多年都係咁，this is my style，終於有人喜歡我 ，我每日都好開心，好感激。」Brian直言在朋友圈、家人和老婆女兒之間，一直是那個大聲、瘋癲、愛玩的人：「細細個開始我都鍾意令到人開心，我見到人哋笑我就開心，我就更加會笑。」他指這種性格延伸到YouTube節目《24/7 Talk》，「8年來，我和拍檔阿肥或者嘉賓交流，都係做返自己，有時我講嘢，阿肥笑，嘉賓又笑，令我更加覺得好好笑。」
粗口是廣東話文化
Brian最常被人提起的，是他「貼地」的粗口風格，他表示粗口是廣東話文化的一部分，「是一種表達方式、助語詞，是一種文化 ，又唔係鬧人，『好X好食，好X正』是廣東話其中一部分，所以我好鍾意廣東話。」他續道自己11歲來到香港，才學廣東話，現時聽得講得，還能流利操作，並強調：「廣東話是要保護的一種語言，我覺得廣東話冇粗口就差咗啲嘢咁，這些是香港先有，其他地方都冇。」他又指粗口當然要適可而止，更稱自己非常喜歡創作一些字眼。
尊重別人 只做自己
提到直率的個性會否容易得罪人？Brian表示：「其實我依家講嘢都會得罪人，但我唔會點理，因為我意向並不壞，不是想佢死、不是想佢輸，所以問心無愧，我覺得做啲嘢冇錯。如果頂唔順我啲粗口，就唔好聽忘記佢。」他又指「尊重」是非常重要，「做返自己！如果啲人唔鍾意你做自己，你無謂要做另外一個人，令到人鍾意你，我覺得咁樣好辛苦。」
早年Brian面對不少負評，例如被指擦鞋、假面具，他坦言不介意：「that is not my intention，我見到長輩係一定會尊重。」Brian又提起早前天后鄭秀文接受他的訪問，當中他大膽說到炸A4紙都好食，Brian笑言：「我真係唔知佢個花名係A4紙，完全冇攻擊目的，因為我講緊係炸咩都好食，A4紙炸都好食，佢聽到A4紙就喺度笑。我都係好尊重佢。識我嘅人都知道我不嬲係咁。」Brian續開心表示，近來越來越多人接受和欣賞他，haters亦相對少了：「對於我嚟講係一件好事！」
堅決不用粗口鬧女
談到家庭，Brian的語氣立即變得柔和，他希望與女兒李思妃（Tayla Siswojo）能夠保持朋友關係，並透露：「有時忟得滯都會喺佢面前講粗口，但一定唔會用粗口鬧佢，呢樣嘢好緊要。」至於老婆Annie，他指夫妻間多年來都恩愛相處，二人志趣相投，喜歡飲飲
食食。
Brian除了創立「8Five2」自家滑板用品店，近年他最受注目的，就是其飲食節目《Let’s Go Eat with Brian》，他笑言：「人生做愛、食嘢、踩板，呢三樣嘢係the best。」並透露自己是「吃海鮮十五年」的愛好者，去年女兒生日才重新吃肉，更加享受分享美食的快樂。
Brian希望能透過自己的飲食節目，幫助餐廳建立口碑，讓更多人認識，「F&B（Food & Beverage、飲食業）咁難做，如果有人推一推，幫到佢哋生存，點解唔做？」不過，Brian透露接拍原則：「一定要試食咗先，如果好食我會post，會收你錢；如果唔好食嘅，我唔會post，唔會收你錢，我好直接，冇得扮，全部都係真感覺，我扮唔到。」
Brian撈過界做飲食KOL，每日瘋狂「食好西」，他透露一直有努力做運動管理身形，並感恩表示：「我覺得所有嘢都係個天俾我，8年前我已經每日做健身、游水、跑步，好似個天安排俾我，覺得我8年前已經開始勤力做運動，就俾我拍攝飲食節目。」他亦表示因為自己鍾意踩板，所以幾辛苦都會做運動來平衡體重。
「廿四味」強勢回歸
問到對音樂或拍戲的憧憬，Brian直言仍然期望有一個「好角色」出現，「我好想做一個作品係人人都覺得好好，好有趣。」更預告廿四味即將會有新歌推出，6月份更會登陸黃埔TIDES開音樂會。
最後，Brian認為人生的一切，上天早已經編寫好：「我自己真係冇乜脆弱嘅一面，唔係扮嘢，因為我信所有嘢都係整定，寫好晒，唔輪到你擔心。我都冇諗過我會因為之前個訪問突然間爆起，所以冇得諗咁多，唯一keep住就係要努力，正能量，諗吓點令到人哋開心，自己盡量再開心，咁就OK。」
