曾智華
任何公司、城市、國家，有視野的領導人，必定會制定一套「傳承大計」，讓年邁貢獻者慢慢退下，交棒朝氣勃勃新人接力。
最近與一傳媒行家閒談，佢問小弟：「碌Sir，為乜你60歲話收咪就收咪呢？點解唔趁做得，繼續做落去呢？」
「第一，公務員制度，夠鐘就必須退下，畀新人接班，如此，政府運作才會生生不息！係嘞，點解你機構幾個負責人，做到70幾歲都唔交棒，過晒退休年齡，仍坐住過去幾十年個位唔放手呢？公司有冇認真落實退休及傳承制度的呢？」
對方默然苦笑，唔知點答，我亦不再強人所難，一家唔知一家事。
幸而香港馬圈並非如是，就算明星練馬師、明星騎師及明星馬，都有明確退休及退役制度。故此，練馬師才會冒出廖康銘，騎師出現艾兆禮及周俊樂。馬呢？你睇睇上周日「極上紗瓏」點跑，就知A Star Is Born了。呢匹3歲馬逢出必贏，並非靠頂級騎師，只用二線的潘明輝。最令人詫異為今次排大外檔，比上場孭多十五磅，竟仍可以由頭到尾放返終點，意即仍有幾多在手，深不可測！
當日周俊樂也表現出色，樂仔如今已進佔騎師榜「四大天王」及晉身華人一哥，絕冇半點符碌，佢走位刁鑽具膽識，騎功及鬥心明顯高其他華人騎師半班。昔日一哥何澤堯，可能受早前墮馬影響，陰影猶在，搏馬多選擇大外檔殺上，絕少千軍萬馬中穿插而上，少咗殺著。
今晚全泥宴，決定不刨馬，只一心一意捧新人袁幸堯，凡出（共五場）就買WP十蚊雞，然後睇佢如何演繹。十磅仔跑泥地輕飄飄，只要識搶閘帶頭，放出已經叫胡，誠心希望香港騎師又多一粒彗星。