(曾智華)
每個行業，都應是一項專業。最近家居小裝修，再次見證，專業與分工的重要性。
因去年颱風影響，成個主人房兜口兜面入晒水，地板翹起，必須大翻新，尤其漏水的窗邊，雨季前要急急重新修補，地板全部更換，所有牆壁再髹漆。
判頭視察後，打價，睇完，去馬！
第一批來的，是四位粗壯人物，三男一女，帶備各式工具，手執大錘操入房。
佢哋負責乜？搞破壞！將一切扑爛，全部變垃圾，然後一二三，全部抬走，手法純熟，老友，拆嘢都係專業工種嚟㗎！
四人夾手夾腳，只需個多小時，將大床連床褥及床頭櫃等傢俬拆掉，兩人負責抬走。另外兩人火速將地板起掉，又再一籮籮運走，個多小時完工。四人開工前，非常細心將搬運需要途經的地方全鋪發泡膠，以保證清潔及不會弄污其他地方，部署有板有眼。
A隊完工，翌日B隊殺到，正是油漆師傅。首先將全房批灰，尤其窗邊的腐蝕地方，兩日已將全房牆壁、窗台變新淨。
小弟好奇之下，上網查查點解佢哋可將牆壁變新？原來油漆師傅在未上漆時，是用菜膠、福粉、石膏粉、光油及白膠漿等原材料，混合成批牆灰，當然，手工必須精細，才可將牆身變光滑。
批灰後兩日，全房先停工風乾，之後再分兩日掃兩層乳膠漆，立時四壁靚仔晒，新樓一樣。
油漆大軍撤退，再到地板師傅進場。專業到不得了，毋須兩天，已可將全房地板搞到「貼貼服服」，一點瑕疵都冇，再收隊。
過程中，判頭「太子」適時巡邏視察，確保進度及質素。
小弟過往裝修無數次，這次最專業，奇在竟可在承諾期內完工，之前未試過！
裝修，通常煩到抽筋成頭汗，今次搵著個好判頭，舒服晒。