(黃秉華)
坐定定，背靠茶餐廳座上，你會聽到好多街坊智慧，利申︰無意「偷聽」，而是「逼聽」，事關街坊對話幾大聲。
「成日監個女講英文，返到屋企都如是，你又唔係打算移民美加澳，你唔知諗乜？」「阿媽，學好英文，第二時個女去邊度都得，我細個唔係畀你同阿爸送去英文名校，我今日點供得起層樓。」「阿仔呀，唔係老竇話你唔啱，而係世界變咗，唔識中文，唔曉普通話，呢一代日後就會好普通。」
明白，我趕時間要埋單，不過，剛才我在飲奶茶之時，碌到一段視頻，係央視新聞，唔係AI自媒體天馬行空之作。女主持介紹軍用機械戰狼實戰，嘩，睇完之後，你唔學中文、唔曉普通話，你點止好普通，死人都有份！
話說國產機械戰狼配合軍人作戰，軍人全用普通話操控，問你驚未？遠程總部阿Sir呼喚空中打擊助攻，明明白白用中文指令，你唔驚，我就真係好驚。
唏，打打殺殺嘅嘢，我唔啱聽！好，講太空任務，人類登月偉大工程，你啱聽喇啩？美國放聲氣未來再送太空人登月有阻滯，改為主力在月球興建太空站，你可知否？So？中國太空站遙遙領先，雖然未搬到月球，依家開放予各國人員參與有關活動，但你要識中文先得。
街坊朋友要阿女學英文，嘞嘞聲嗰個級數，OK，我無意見，精通幾國語言，幾時都係好事，不過，就算你移民美國，第二日阿女要去中國留學，去中國搵食，咪一樣要學好中文！