(曾智華)
上周五本欄刊出《同志仍須努力》之後，火速收到幾位女長者和應，全部皆對目前內地山區旅遊景點的食肆不滿，喝問如今甚麼年代？中國發展各省各市景區旅遊已二十多三十年，豈會不知外國遊客及港澳同胞的如廁需要？究竟有冇官員認真面對過問題？又或因從來冇人好似小弟咁「大聲疾呼」，故當冇事發生？
女長者們一致對只設踎廁的餐館及景區極度不滿，揚言以後不會再去，以免攞苦嚟辛。事實，個別表示曾勉強試圖用，慘情，根本再站不起，要呼叫門外的朋友支援，尷尬死！其中一位更苦過「Dee Dee」，因成個人跌咗落廁坑。
希望中國旅遊局負責人能看到此文，將全國宣示的「文明」，落實到衛生間的設計上，切勿以為自己的文化習慣就是全人類的文化習慣。
柴完A，讚返B先，正是「中國速度」。
上周提及過去三十年，內地公共建設出現驚人變化，尤其交通系統，無論高鐵、高架橋樑、超級公路、穿山穿海隧道多及現代化，已肯定是全球第一，毋庸爭辯。
另一樣是物流速度，也超勁。
武漢行程中，有位長者發燒暈眩，要Call救護車，火速送到武漢市第六醫院。絕冇似香港急症室般等呀等，等到天長地久，而是很快已有醫護人員處理，查清所有維生數據，肯定冇即時大問題，只是發燒及輕微肺炎，於是先開退燒藥，留院一晚，穩定後再回港。
翌日可以落地了，但全身無力，點搞？領隊Ruby當機立斷，上淘寶查輪椅銷售，鎖定較好質素二百一十四人仔的，即訂。
由落單到醫院收貨，一個半小時，長者即可舒舒服服，毋須走路就安然上高鐵回港。
這種中國速度，舉世也暫時少有。