最近與一位愛狗的老友晚飯，佢話有位舊同學A，最近陷入極度苦惱，原因與家中的寵物有關。
阿A屋企有隻狗，在BB出世時買回家，諗住讓BB有個伴侶，令家庭開開心心熱熱鬧鬧。起初幾年正是如此，狗仔與囝囝建立非常穩固感情，成日攬住一齊瞓。
養狗仔者必知，狗仔的老化程度，快人類好多。正如小弟，家中的八哥「哈仔」，我60歲退休時買入，當時BB仔一隻。
經過十二年了，我由60變72，佢就由BB變12。狗仔12歲，已步入老年，行動緩慢，牙齒脫落，各類老狗病相繼出現。
這是正常而非反常，我60變72，有老化但不嚴重。狗仔完全兩樣，好快就要面對佢離開世界。
講返阿A，囝囝一日一日長大，由0歲到12歲，仍是童年，但家中的小狗，由0歲變12歲，就變老年，會點？結果近月隻狗不停生病，眾所周知，狗睇醫生遠貴過人睇病，一次就千千聲，而A哥隻狗證實患癌，結果財政再頂唔住，當然要考慮將狗仔送上天堂，因無理由為一隻患絕症的寵物，搞到家庭破產。
只是囝囝死都唔肯，日日以淚洗面，點搞？錢已用光，難道借大耳窿？
說來，做馬主撇脫得多，因個個有心理準備，隨時會人道毁滅，並且感情也不似養狗仔。
老友B傳來圖表，介紹馬匹與人類年齡比對：馬1歲，人10歲；馬5歲，人25歲（體能黃金期）；馬10歲，人35歲（運動員要退役了）；馬15歲，人45歲；馬25歲，人70歲，正式步入老年。
明日最好睇高班短途，三匹明星互撼：「閃耀天河」、「時時歡欣」及「燈胆將軍」，後者失蹤五個月再出，不如隻隻十蚊W啦。