曾智華
上世紀七十年代開始，有機會踏出香港，依次到過內地、台灣、菲律賓、泰國、韓國、馬來西亞及新加坡。之後衝出亞洲，飛到歐美各大城市、夏威夷及美國，眼界大開，因英法的現代化火車系統及美國的超級公路建設，簡直先進得難以想像。
當年見到倫敦、紐約及東京的地下鐵路，也視為驚天之作。再者，在倫敦及三藩市大橋漫步時，更有大地在我腳下之感。大家唔好笑小弟崇洋，因那個年代，歐美真的事事比亞洲各國優越得多，軟硬實力皆如此。
但隨著時代巨輪推進，跑吓跑吓，慘，竟然出現勁大反差？
當年爛衫爛褲、食不飽穿不暖的內地同胞，以及又破落又殘舊的城鎮，全部起了戲劇性變化。單講公共建設，高鐵網絡已覆蓋全國，超級公路也似蜘蛛陣般四通八達。所有一二線城市的摩天大樓崛地而起，最先進城市級高架大橋及海底隧道多不勝數。
但世界另一邊呢？又係慘！剛剛再訪歐美，咦，乜咁嘅？過去半世紀發生乜事，點解一切公共建設，仿似時光停頓，全部原地踏步？
不過，話時話，中國雖不少大建設有飛躍進步，但中低層的民生及郊外城市，則同志仍須努力改進。
舉簡單實例，小弟不時與大群長者遊走內地著名景點，理論上，全部皆應奮力吸納遊客，尤其外來的。但奇，竟在最微細的骨節上，了無寸進，例如衛生間，十間有九間山區景點酒樓皆不設坐廁，清一色踎廁。咁就死得，你叫八十、九十歲女長者點搞？尤其用枴杖、坐輪椅的，兩腳根本無力，點踎？
昨日小弟又在武漢遇上同一情況。不良於行伯母「求廁無門」，苦不堪言，極度尷尬。
中國要全面現代化，同志仍須努力呀。