(曾智華)
打吡大戰，本欄貼士一箸夾中「白鷺金剛」，感謝馬神。
大賽過後，雖然話一節淡三墟，但馬圈另一個高潮來臨，冠軍練馬師之爭正式埋牙。
小弟估邊個冠軍前，先講一套哲學及價值觀。中國人傳統主張低調，想出頭也扮誓不出頭，幾大唔講真話（虛偽）。
細細個開始，我已被長輩教訓——做人要謙虛，禮讓，切忌將野心（其實雄心）暴露。
基本上，呢套觀念，大部分人奉行，所以，在學校內，明明想考第一話唔係；明明想贏波，就話友誼第一，比賽第二；明明已經將考試所需的素材背到滾瓜爛熟，就話冇乜信心。
出到職場更信「槍打出頭鳥」，明明想升級，就話想提早退休，又或冇興趣爭取更大權力，怕太辛苦。
呢種「華人思維」，根深柢固。每年大量香港學生到美國留學，上堂時十之八九會縮埋後排坐，絕少發問，只默默猛抄Notes。
在美國讀大學時，有教授問我：「阿碌，乜啲香港學生咁嘅？美國文化主張勇於表達意見及據理力爭，你哋又唔問又唔激辯，咁遠來讀書為乜？」教授問小弟，正因見我乃罕有的香港學生「反面教材」——極度多口，餐餐舉手發問，也不停提另一角度觀點。事實，我天生多口，正因如此，回港後也是以做嘭嘭聲的電台直播維生。
今日講呢啲，因覺得今時今日表露雄心，若是真的，會得到好大欣賞及支持。
呢呢，今季練馬師冠軍就正是如此，方嘉柏及廖康銘擺明車馬爭奪冠軍，冇華人的扭扭擰擰扮謙遜與世無爭，咁就好睇嘞。
我兩個都支持，但希望方仔奪冠，因佢完全唔用冠軍騎師，若成功，即功力高所有對手一班波！
今晚賽事提供女讀者必愛——「一起美麗」！