上周奧斯卡頒獎典禮，一如以往，紅地毯非常好看，出席的女星個個「唔衰得」，當然爭妍鬥麗，因全球時裝專家𥄫到實，評語絕對冇面畀，可以極端刻薄。任何女星造型若被洶湧負評，咁就真係弊，唔去好過。
其實所有女星皆有專家負責設計形象，主要突出其身段優點，以及考慮能否吸引記者眼球搶住影。
上周睇本報「外娛」版，對一眾女星形容，最過癮為形容靚的「血流成河」（靚到噴血）；相反，醜的同樣也「血流成河」（核突到嘔血）。
靚的趣味性不大，醜的則好抵死，包括：邪爆黑寡婦、現代鴉烏婆、高中舞會裙、半夜走難裝、怪誕舞孃。
女人，尤其女明星，當然愛靚，個個長期對外形「刻意經營」，搞到貌似天仙（自己以為係），若被踩到變地底泥，點啃？
時裝小弟自認外行，但對女性的外貌身形，則可以評論一下。
今屆紅地毯上，最令人「震驚」為妮歌潔曼及狄美摩亞，兩皆曾是電暈男人的大美人，出道幾十年，妮歌已58歲，狄美更老，63歲。
唔知點解，兩人皆放棄早年最Top Fit的有點肉身形，改而追求皮包骨，仿似染上厭食症。須知你一瘦，就全身都瘦，會冇晒Figure㗎，就算上鏡明明會拉闊人，都會仍然覺得你冇半両肉，何來吸引？可能小弟欠缺審美眼光，真真唔知瘦到得棚骨有乜好睇？
近日橫掃台灣票房的《陽光女子合唱團》，片內最受歡迎又最令觀眾看得舒服是誰？對！翁倩玉是也，76歲，真樣示人仍吸引，氣場十足，身材圓潤，完全冇跟大潮流搞瘦自己。另一笑彈鍾欣凌更厲害，53歲，綽號粉紅豬，狂受歡迎正因是顆肥嘟嘟開心果。