(曾智華)
新春聚餐，見到昔日同學仔「靚媽A」健步如飛，神彩飛揚，成個開朗晒。
時光倒流三年前。每年同學仔都會團拜，去到我哋年紀，當然個個周身病痛，三高糖尿Covid又或不幸中癌症外，更多是筋骨痛。
最普遍有網球肘、坐骨神經痛，以及苦不堪言的膝蓋「夠鐘」，失晒潤滑液令軟骨磨損，呢種病冇得返轉頭，先而食止痛藥，繼而行路拐󠄆吓拐󠄆吓，徹底根治正是換膝。呢種手術，二十幾三十年前好驚人，極大鑊，因換完要將腳吊高固定位置，日期以月計，到拆線落床時，試過的話痛到BL（即標尿），之後有排學行，再頻頻做物理治療。
拜科技所賜，如今換膝，雖未至易過借火，但普及程度飛躍，幾乎間間醫院都有做。
香港做，一般二十幾至三十幾萬元，去台灣做平三分一，效果相若，消費病人自己諗。
「靚媽A」邊度做？寶血醫院，做齊兩隻，二十萬元出頭，可以負擔。
「碌Sir，講都唔信，手術後兩日落床，冇乜點痛，之後跟進物理治療，你睇我如今行得幾好！唉，真係老襯，其實三年前就應該做啦，因諱疾忌醫！你若有此病朋友，必明小妹之苦，忠告佢哋早做早享受呀！」
講完，佢半點都冇拐󠄆吓拐󠄆吓，快步去咗搵其他人Social。
不過，萬事非一本通書睇到老。眼醫權威P醫生對做白內障手術有另一番見解：「碌Sir，手術並不一定早做早享受㗎，例如白內障，要換晶體，如今科技一日千里，晶體的質素日日推陳出新，半年前與半年後換的晶體，質素已可能大幅不同。所以，若非覺得立即要做手術，等多一兩年，可能更加一勞永逸，咁就變咗遲做得到更高享受㗎喇。」