曾智華
邊四個「大賊」？點樣打劫六億元？幾時發生？點解新聞冇報？
四個「大賊」名梁錫光、劉栢輝、程志輝及陳家樑，皆長者，當然冇可能用暴力打劫，而只是用財力及運氣去打劫。
點樣打劫？次次光明正大，冇刀冇槍，坐喺度，錢就自動奉上。
幾時發生？由2019年3月開始到今時今日，仍然未完，估計會再劫多兩年。
新聞有報兼大字標題——嘩又「打劫」幾百到千幾萬！不過，並非在新聞版，而是在馬經版。
至此你明啦。
冇錯！四名「大賊」正是香港四匹經典馬王馬主，佢哋上周五齊齊出席「香港評馬同業協進會40周年慶典」，碰頭時當然嘻嘻哈哈幽幽默默，酒酣耳熱，就有人拋出以上「打劫」笑話嘞。
好，等小弟計計數，佢哋至今「打劫」咗馬會幾多億元獎金先：一、金鎗六十167,170,600元；二、嘉應高昇137,135,900元；三、浪漫勇士254,665,697元；四、遨遊氣泡130,705,975元。
以上四匹，共「打劫」了689,678,172元獎金，數目的確極度巨大。
四位「大賊」乃全港馬主偶像，個個日日發夢——若果有機會做佢哋就好喇。
唔使羨慕，其實四位皆九成靠運氣，因能擁有馬王，根本不能單靠錢（你夠「美麗系」多？），若無運氣，絕冇可能㗎。
今晚又跑馬，周日舉行全季表列賽最高獎金的打吡大賽，有機會出戰又可能贏的騎師，當然會錫身少少。故此，留意吓冇得騎打吡的二三線騎師啦。
今晚我唔貼馬，只以搞笑心情睇吓隻「交學費」交夠學費未，出九次，次次輸三至十個馬位，今晚又如何呢？