曾智華
今天此文見報，勝負已有定案！
乜事？話說兩周前，小弟在老友群組發牙痕，指《夜王》票房應該過億元！點知熟知演藝娛樂事業行情的老友蕭潮順立時彈出，話唔信，冇可能！
群組內塘邊鶴立即起閧搞事，不如你兩丁友輸一餐，益手足可以一聚吖。咁大理由，好，我先殺，蕭博士接波。
男人十之八九愛認叻認威，我倆當然如是。嗰日開始，蕭公子及眾兄弟不停跟貼票房走勢。起初我諗住輸硬，因墮後頗多，點知⋯⋯
點知乜？去到上周三截數，竟然破咗九千萬元，即仲有四日拗手瓜，無論輸贏，都叮噹馬頭。咁就更加緊張，塘邊鶴日日Update。「孟嘗君」Fit馬許下海口：「邊個贏我都贊助全場法國靚紅酒！」
真㗎，我完全唔著緊輸贏，因已踏入「恭喜散財」心態，有機會請老友食一餐，大快樂也。假若一個唔覺意贏咗，我都會帶支陳年靚嘢去，有個藉口豪一次。
講到《夜王》，不停有人問：「你去過未？」去邊？去晚晚十萬八萬到幾十萬元上落的銷金窩！不少「水魚」找完數，仲帶小姐出街直落㗎。
其實這類場所已經消失三十年，好多年輕人全冇印象。不過，人人倒好奇當年裏面究竟玩乜，點解可以引人燒咁多錢？
你問我？答曰：當年做生意朋友，十之七八去過或要去，否則流失好多大客。至於高官，也有不少會去，因單純受邀請娛樂不算犯法，但當然觀感極差，別人為乜要使十萬八萬元請你去消遣？當然因你的官位，希望以你權力獲優待！有腦嘅都應知！若高官話自己使得起去玩吓，更戇居，必被廉記查「生活與官職收入不相稱」。
點解銷金窩成日被警方查牌，唔該學吓答！