(曾智華)
香港賽馬好好玩，因變幻莫測，開出的結果，經常與馬迷捉迷藏。你估A跑出？我就開BCD。兼且唔使理由，更全無英語所講的Consistency（連貫性），真真吹乒乓。
但馬迷也好幽默，睇見不合理情況，總有古靈精怪的形容詞，例如「冇開工」。
呢呢，周三正正如此，騎師龍虎榜上的前領三位大師傅：潘頓（八十四W）、布文（三十九W）、艾兆禮（三十五W），論騎功，論戰績，明顯拋離其他十九位騎師。哈，唔知係有劇本寫好，定或有晒默契，周三幾位大哥全部啞火，一隻W都冇。布文及艾兆禮更話冚旗就冚旗，連一隻P都唔交出，完全走樣，毫無二三哥本色。
馬迷又可以點樣？連直播的馬評人也只能笑笑口，話佢三丁友「冇開工」囉。有返工而冇開工，純粹坐上馬背渾渾噩噩遊馬河，畀其他兄弟搵食，如此騎師王就會好分啲，好多人得益㗎，明嗎？
當晚我的貼士也瞓街，本來諗住葉楚航出八隻，會「開工」，又估錯。終於頭兩場見佢完全冇動靜，之後全部慳返。
好嘞，明天又如何？都幾肯定潘頓呢條「軟硬鞭」及葉楚航會回魂。因有隻「價值傳承」在陣，冇得唔搏，一千米專家，唯一排三檔少少不利，故此，必有攔路虎，邊隻？
呢場論跑一千米，「好評如潮」出一次W一次，但今次排一檔，難搞。「三甲之星」最具威脅性，出一次即入Q，今次十二檔，靚絕！
舊馬中有一匹不可忽視，乃韋廄的「會長之寶」，排位前韋達刻意親試一課，此馬今季八次出戰同程，竟能四次入Q，絕對不簡單。
點買？我會以「價值傳承」一隻，二重彩複式膽拖上述四隻，八十蚊睇睇佢點開！