曾智華
若非老婆大人一再推薦，為夫真的沒有太大衝動入場睇《陽光女子合唱團》。
因女子監獄電影，香港拍了多套，來來去去都是販賣色情暴力的低成本低品味電影，睇都浪費時間。故此，當老婆大人介紹女子監獄電影，我先天已有多少抗拒——乜嚟㗎？但大人好日唔咁積極，相信一定有啲嘢，好，上網搜搜先。
咦⋯⋯勁喎，此片乃台灣歷年來華語片票房第一位，兼且最吸引為去年除夕此片上映時，票房麻麻，兩周只收四百萬港元，弱過弱雞。點知單單靠口碑，票房走勢出現驚人的爆炸性增長，台灣形容是「發酵力巨大」，結果人人爭先恐後湧入戲院，就此票房似火箭升空，已衝破七億台幣。
香港又如何？上周上映，真真冇聲冇氣，發行及院商皆冇做排山倒海的宣傳，兼且不少院線冇排此片或天地場，看形勢，極有可能一套優秀動人電影，被慢慢活埋，真是不忍卒睹。
小弟再施故技，各位，請快快入場看，看後不滿意，我私人回水！
《陽光女子合唱團》可分享的點子甚多，但紙短情長，只講一位——翁倩玉。
資深影迷及歌迷，無不對翁倩玉印象深刻，因1972年（五十四年前）已憑《真假千金》，摘下第十屆金馬獎影后寶座。1988年更憑日劇《阿信的故事》主題曲《信》，橫掃樂壇，長期高踞流行榜首位，輕易奪得香港白金唱片獎。
今年翁女士76歲了，嫲嫲級，亦在銀幕消失四十多年。一位日本及台灣的演藝界重量級人物，為何此時此刻願意復出拍電影，有何大到不能拒絕的原因或吸引力呢？更何況要九成時間素顏，以真實老化了的樣貌示人？
你肯定也想揭開謎底，易，入場啦！