(曾智華)
童年開始，我就是個警匪片迷，幾歲已跟爺爺入場，睇曹達華扮警探，到自己有能力買票入場，更是所有中外警匪片連汁都撈埋。
最早捧的是李修賢那種麻甩雜差電影，一路發展到成龍的搵命博《警察故事》及陳嘉上的《飛虎》系列⋯⋯再後，就是正邪不分的「臥底電影」，代表作是《無間道》，搞笑的《逃學威龍》也一部不漏。幾十年了，仍樂此不疲。
所以，當上周《衝鋒：火拼》上映，就第一時間殺入戲院睇早場，先睹為快。
基於感情投入，絕大部分警匪片，我都覺得好看，這套不例外。
呢套也似早年成龍系列，火爆陽剛，打到開花，除用槍外，也連場肉搏。唔好問合唔合理，點解唔用槍而用拳頭，簡單，正因本片的動作指導兼主角之一張文傑，乃真真正正的武林高手，3歲已開始習武，精通詠春、跆拳道、泰拳及西洋拳。咁Quali，點會唔打餐飽呢？加上主角之一安志傑，也是武術迷，當然玩盡。
凡警匪片，電影橋段都是來來去去差不多，難有突破，故此，入場尋求感官刺激已夠。
有點好笑，此片主線人物為方中信，扮PTU沙展，喂，原來佢已經62歲，在真實世界，退咗休好多年啦。
但也不能不佩服老方，身材仍Top Fit有型，雖不用連場打鬥，但也要追追跑跑兼天橋跳下（明顯吊咗威吔）。
唯一可惜，著名武打演員錢嘉樂，竟安排佢一出場就中槍，結果成套戲拐󠄆吓拐󠄆吓，認真嘥料。
當時得令的陳家樂，冇乜表現機會，因唔多打得，反而扮演「首席大賊」的張繼聰，夠晒陰深凶險，也打得兩嘴。
呢類電影，女演員永遠是花瓶，呢套幾乎連花瓶都冇呀！