曾智華
香港人十之七八喜歡出外旅行，理由有千百個，其中之一，大部分人皆不會宣諸於口——在外地，冇人識我，可以自自由由地做香港不能/不便做的事。有頭有面有知名度，又或有公職身份者，尤有同感。
乜係香港不能做的事？
簡單到若你是政府高官、明星、大集團CEO，若在香港，能否短褲背心踢拖周街行周街食呢？成何體統？破壞政府機構或個人形象同時，也可能摧毁市民期望及破壞政府權威。
「罪行」可以好大㗎！
我又如何？如今冇晒公職在身，退休閒人阿叔一名，當然Free好多。但在香港，難免有啲嘢唔方便做，費事有人報畀老婆大人知，例如：「曾太，我見到你老公行色情物品店呀！」
有性學教授老友話小弟知，香港其實也有不少各級品味的情趣店，大部分更是由斯文大方女性開設及主持的，但我仍是不敢拜訪。
今次到台北，照舊又通街逛。咦過癮，酒店附近有間二十四小時無人「秘密花園」，個名咁吸引，當然睇睇乜料？
推門入內，呵呵，原來是標榜——讓愛更有情，讓愛更有趣的性商店。
既然在香港唔方便參觀，如今「將在外」，幾大都睇吓啦。真真有點「劉姥姥入大觀園」感覺，原來性商店可以變出咁鬼多花樣、道具及服裝，有專攻男，有專攻女，有專攻男扮女，專攻女扮男的也不少，也有專攻不男不女用的。
最奇，我初初以為，性服裝必定是暴露的，原來唔係，竟然有酒店禮服、旗袍、馬甲、和服、老師服、校服及空姐護士制服，更有居家睡衣⋯⋯點解咁多，大字寫上——角色扮演用。
都係唔形容咁多嘞，結論係小弟有興趣睇而無興趣用，開吓眼界，一次夠皮。