馬年老友聚會講笑話，我就懵懵吓，只係識得舊陣時港產片經典，唉，仲好好笑，不過無乜潮流感覺，大家勉強哈哈哈。「我覺得最好笑就係馬斯克睇完春晚機械人講嘅爛Gag。」咦，聽開場白幾吸引噃，「鋼鐵俠」好得閒咩？有心情欣賞一個不屬於美國與民同樂的節目，乜唔係要追電動車銷售KPI，同埋諗吓幾時移民火星咩？
朋友聽我講嘢咁三尖八角，反而好耐心解釋︰「馬老闆依家最關注機械人產業，正如星爺話齋『仲踢波』？」我回應一句︰「波並唔係咁射嘅。」應該係點射？「一句說話，腰馬合一。」何謂腰馬合一呀？「咪係少林功夫啦。」
亮相春晚的國產機械人令人喜出望外，馬斯克觀後如是說︰「我們低估了中國，中國機械人技高一籌。」春晚之前馬老闆尚未知有「少林機械人」這個門派，侃侃而談特斯拉的Optimus機械人有幾醒，宣稱明年普及推出，世界進入新紀元，例如機械人可以為人類代駕，最快2028年為生活帶來革命性改變。吓哇。
睇個勢頭，年宵新十五，國產機械人全面進駐各大商場進行商演，此外，「少林機械人」隨時變身成鐵甲兵團，效率勝過無人機……2028年，發展到甚麼地步？真係要問AI系統先至曉答你。
「不過，有乜好笑？」「馬斯克最好笑係話，中國機械人勁，好好嘢，預計全球機械人製造，從第二位到第十位都係由中國壟斷喎。」吓， You’re killing me！笑死我也。馬斯克真幽默。