周三賽事，本欄提供三隻貼士，Do-Re-Mi咁返終點，大快樂！
「軟硬鞭」上周日食滯五W，立即玩冚旗，等明天沙田大賽再「開工」，馬迷吹乒乓乎？
不如講吓「嘉應高昇」，一隻孭起成個香港馬會在國際馬壇的形象，點解？因星味十足，魅力無窮。
小弟出身傳媒與娛樂圈，見證不少成功造星個案，本來外貌平平無奇的小子或少女，經過化妝師、服裝師、形象指導⋯⋯包裝，加上經理人指導談吐，不少幾年後即搖身一變，成為明星。
當年梅艷芳也是如此，若大家有睇過電影《梅艷芳》，自可領略。
前晚與愛馬之士團拜，自不然談論到馬，在座皆資深馬迷及馬圈人士，一致對莫雷拉重臨香港，有莫大興奮感，因佢乃是徹底的騎師明星。
近年香港馬圈，只有潘頓一粒星，古語有云：無敵是最寂寞。當一個圈內只得一股勢力，佢自然會（不自覺地？）隻手遮天橫行無忌，如此，成個馬圈又中多一句——無競爭無進步。
香港賽馬絕不百花齊放，因所有好馬，八、九成盡歸潘頓之手，任佢揀，有雞就有蛋，自然佢成績彈離所有騎師，終於個個都要睇佢面色買佢怕。
方嘉柏目前是前領練馬師，擺明想爭冠軍，基於「歷史因素」，唔想用潘頓，咁點搞？有嘞，千方百計請世界一級高手雷神重臨，即時形勢就唔同晒。
講到明星感，在座皆渴望馬會認認真真設立一個「造星部」，將戰馬、練馬師及騎師用娛樂圈造星手法包裝及宣傳，注入年輕活力，擴大馬迷年齡層。
明日沙田兩場大戰，G1賽冇乜味，難道「浪漫勇士」出來輸？買十蚊W等馬會派錢。另WP捧深不見底的「數字天文」！