恭喜發財，祝大家龍馬精神，馬運亨通，馬到功成。馬代表渾身是勁一往直前，出閘即奔向最大目標——終點。過程中，只會奮力前進，乃小弟的偶像，一生都希望自己能充滿駿馬精神及拼勁。
馬唔會蠱蠱惑惑，但人會，包括騎師及練馬師，你永遠無法掌握佢哋心意（有人話賽馬好玩之處在此，否則次次大熱贏，冇癮）。
但總的來說，馬圈仍是個跟紅頂白的金錢圈，人人都以爭取贏馬（名氣與獎金）為最高目標，所以，一定冇乜人情講。
一匹馬，騎師贏唔到，就會換人。同樣，一匹馬，跑極唔得，馬主就拉倉。
圈中本來有個最關照發霉騎師的方嘉柏，但也比潘大衛激到紮紮跳，本想人間有情，點知佢輸吓一隻，輸吓又一隻，跑足132場仍食蛋，創下香港馬圈紀錄（記憶所及）。
所以，研究馬，毋須講情啦，只講實戰紀錄。今季「過江龍」，有最渣騎師潘大衛，亦有勁到彈起的南非練馬師桂福特，跑咗半季經已爆倉，絕沒半點符碌。看台公認佢為「爆樽王」（火速令拉倉馬W出）。一般來說，拉倉馬多在上手馬房冇表現，才決定換新環境試試，當中不少是垃圾馬，有排先會搞得掂。但好一個桂福特，能夠兩場內撚出頭馬的，竟包括「飛躍凱旋」、「悠悠乾坤」、「競駿天下」、「瀧澤飛駒」、「鼓浪好友」、「開心勇駒」及「金牌活力」。
以上絕少來自弱勢馬房，有四匹本屬希斯及告東尼，冇得唔服！
桂廄上名率為32%，超犀利，戰馬一定要睇！今日出九匹，「三甲之星」必熱，W得。
其他新轉倉又有機會爆樽為「安遇」、「開心樂園」及「怡昌奇兵」，每隻買十蚊W，一齊嗌啦。