曾智華
一直以來，小弟乃星島集團旗下贏跑台的粉絲，賽馬日直播，只睇《賽馬日在線》，因畫面清晰，主持人較官台的四平八穩作風有趣，兼且久不久彈出客席報料員，例如以AI理論貼馬的「Logic Horse」，以及神神秘秘負責偷窺沙圈動態的「零零亨」。
但過去數年，小弟對此台仍有一點不滿，就是冇海外賽事直播，不少經典大賽，在香港賽事日同時舉行。可惜一到播外地賽，贏跑台即一片空白。
完全無法明白，既然馬會畀得條本地賽事直播Feed你，點解唔畀埋外國賽播映Feed？有乜難度？係馬會問題定贏跑台主事人問題？
等呀等，望穿秋水，終於有突破喇！
今晚到凌晨，全球最高獎金的沙特盃，終於可在贏跑台直播，遲到好過冇到。尤其有特別意義，因香港馬「自強不息」將出戰維雅德泥地短途錦標賽，我當然細細注大大聲打氣啦！
今次真係馬迷的喜訊/福利，完全免費，揸住手機就可以去到邊睇到邊，玩足七場，過完癮後，先唞幾日，初三再「踴躍捐輸」！
今日香港馬迷樂透，跑足十七場，因日間沙田有十場。
睇練馬師布陣，蔡約翰應該大舉出擊，擺出兩隻餐士馬「俏眼光」及「巧眼光」，兩皆幸運馬主譚榮根愛駒，論養馬，老譚的馬緣，真係恨死隔籬，因佢的「眼光系」，幾乎隻隻贏到你唔信，今日兩隻都有機會㗎。
重點錦標賽TVB盃跑二班千二米，估計今季尚未出頭的「氣勢」大有機會奪𣁽，到時大家又可見到尊重法治精神市民的偶像——昔日的香港首席大法官李國能是也。「氣勢」跑開級制賽，回到二班，虎入羊群，我會單W捧場，望「哈囉文」生生性性！
