誰是「刮穿煲」？飲食江湖無人不知，正是用大量蒜子炒鱔及膏蟹炒粉絲的基哥。砂煲上枱，次次客人搶住食，最後一件鱔或蟹冇清光時，客人仍不停手，刮埋煲底最後一滴汁，你刮我又刮，柴娃娃仿似要把煲底刮穿才收手。
基哥開業時，只是平平實實用「基哥火鍋」作店名，後來基於廚功高，出品好，雖小店隱身在土瓜灣橫街，也引來大量為食粉絲慕名而來，終於，某次一位文學修養頗高熟客提議：「基哥，火鍋名字太平庸嘞，一於叫刮穿煲啦，這才夠抵死生動呀！」
自此，「刮穿煲」就在飲食界走紅，不過，紅極也沒法擴展，因基哥乃執拗藝術家，對出品要求甚高，只有自己出手的，才覺滿意，才肯收貨，然後奉客。
咁搞，即係One Man Band，一晚點可做多過三圍？大家想想，一個人味味菜式用左手在熊熊烈火前拋鑊，消耗的體能多勁？一晚半晚冇乜問題，一年半載也頂得住，但十年二十年下去，你話會點？入廚四十年，日日係咁拋鑊的基哥，十多年前左邊身已經出事，筋骨勞損日趨嚴重，壞到無法康復地步，醫生警告，再唔停，左邊身將報廢。
基哥當然不願拋下鑊鏟，於是中醫西醫外，連神醫都拜訪，以求做多一日得一日。
只是人非機器。事實，佢五年前已曾頂唔順痛楚封刀，但休息三年後，又心癢難當，加上有粉絲業主平租邀佢出山。
不過，炒完幾個月之後，今次身心俱作出警告：「唔准再拋鑊下去，否則⋯⋯」
無奈，決定年廿九再見江湖，今次真要忍著淚Say Goodbye喇。
小弟作為佢長年擁躉，最後一次，卜定情人節與家人操去團年，並來次「情人節刮穿煲」。
