維園年宵爆扒竊 市民合力擒賊

維園年宵市場人頭湧湧，竟有扒手趁機「搵食」。事發於昨日（14日）晚上9時許，網上流傳片段顯示，一名平頭裝男子懷疑在維園年宵市場「打荷包」，但當場斷正被擒獲，並遭多名市民包圍。現場有人高呼：「報警啊，報警呀！」，並提醒在場市民：「大家小心銀包，有人偷嘢呀！」、「小心銀包手機，有人偷嘢呀！」。

對質爆「普通話」金句 惹怒在場人士

被捉着的平頭男不斷掙扎，聲稱「無呀」，否認扒竊。惟一名身穿黑西裝的男子逮着他並質問：「我問你嘢你走咗去吖嘛，我係咪問你嘢走咗先？」未料平頭男突然爆出「金句」，要求西裝男：「說普通話！」此舉即時惹怒西裝男，他大罵：「講XX母呀！呢度香港呀！你同差佬講普通話啦！」最後，該名疑犯被帶到年宵市場一旁，等待警員到場處理。

41歲內地男被捕 網民熱議

警方表示，昨晚9時54分接獲報案，指維園年宵市場一名26歲女子被偷去銀包。人員到場調查後，將案件列作扒竊，並拘捕一名41歲姓張的內地男子，案件交由東區刑事調查隊第5隊跟進。事件在網上引發熱議，不少網民大讚「今次香港人好團結，好嘢」、「做得好」。亦有網民揶揄被捕男子「表情都青咗喇」、「嚟香港偷嘢？你以為係大陸呀？」。