曾智華

食呀食，近年尾，又是團聚高潮喇。去到咁年紀，特別珍惜老友相聚，唔知仲有幾多餐，人人行得走得，可一齊食㗎。唔係悲觀，係面對現實。

所有飯局，幾乎一致要求我諗地點及食乜。一個星期幾餐，都有點頭痛，但此乃Happy Problem。

前晚又四十老友相聚，一個月前小弟已扑槌——呢餐「食出兒時味道」。

去邊？首先，兒時個個草根，點會大魚大肉鮑參翅肚生猛海鮮吖。要做草根晚餐，只得相熟又街坊食肆肯做。

有！一於去「金峰閣」搵楊太，識咗佢二十多年，由高山劇場菜館做到現今舖位，大家早有感情，想食乜，佢都二話不說，做得就做。

菜單我一手包辦，主要包括：街邊車仔咖喱拼（水魷魚、豬皮、炸魚蛋、蘿蔔）、白切新鮮雞（童年只有過年可食一次）、中式牛柳（酸酸甜甜，牛味要濃）、馬蹄土魷蒸手打肉餅、梅菜蒸大鯇魚腩（梅菜要多，鯇魚要肥）、老闆娘手做蘿蔔糕及紅棗年糕（煎燶煎香）、白果腐竹薏米糖水（腐竹要溶掉，糖水要起膠）。

係咪要求多多又刁鑽呢？唔係！兒時做節，記得阿嫲、老媽皆會做的，不難。

時間到，包場四十人，當晚有點凍，逼逼貢，更感熱鬧親切。上菜，大家唔使客氣，呢類晚餐，最忌你讓我、我讓你，又或你夾畀我、我夾畀你，必須好似搶住食先過癮。

任何老閭皆有同一感覺，「碌Sir，我哋最快樂，係見到客人味味清碟，咁就唔使問——今晚啲嘢點呀，滿唔滿意呀？」

單尾去到蘿蔔糕，楊太親自落場，用燈芯火逐件慢慢煎，由手做到煎埋上枱，心血之作。記住，不可撞入去就有此水準及服務，我預早一個月訂㗎。