曾智華

過去幾日，與任何政官商或專業人士晚飯，話題只集中兩個，一為「安全帶之亂」，無不覺得呢鋪蝦碌，真真離晒大譜，前所未見。明顯地，局方、律政署法律草擬科及有份審閱的議員，全部不肯問責，不願上身，故此，至今無一個人企出嚟承認責任及道歉。大家看在眼裏，又點會收貨？喂，咁大隻鑊，點都有個說法吓嘛？搞成咁，好鬼醜怪啫。

另一話題，當然為許仕仁。一提起佢，資深政經江湖中人無不欷歔，因「肥龍」由讀香港大學開始，已是公認的叻人、風頭躉及生活玩家，腦筋靈活到不得了，入政府後，見彈拆彈，正牌「橋王」。

可惜，正因叻到飛起，事事無往而不利，漸漸養成放縱習慣，不單使錢放縱，漠視規矩方面也相當放縱，尤其去到政務司司長大位時，一人（特首）之下，幾十萬公職人員之上，佢做乜都基本無人夠膽公開挑戰。

最弊係政府求佢再次加入幫手，而非佢主動想做政務司司長，這吓更種下肆意橫行的心態。

起初大家都竊竊私語，指佢的生活享受（歎萬元靚紅酒、隨時飛倫敦巴黎睇歌劇、飛機坐頭等艙、買幾十萬元計唱片⋯⋯），其實早早與官職收入不相稱，好奇點解有咁多錢揮霍，唔怕老廉招呼咩？

小弟更「唔識死」，公開在電台直播節目高聲提出：「許司長，請問你點解有半山官邸唔住，而住新鴻基旗下豪宅，究竟交幾錢租呀？」

這其實是一條「提水」問題，等佢知道自己做緊嘅，有好多危機四伏之處。

但佢當時權傾一時，目空一切，當然唔會聽電台，更不會有下屬敢話佢知，有個「膽生毛」電台主持人窒佢啦，否則⋯⋯可惜，最後下場係⋯⋯令人握腕嘆息。