哈哈哈，哈哈哈，本欄賽馬貼士，食完Z之後，立即再有砂糖食！
我極喜歡賽馬，必須強調，最高樂趣並非贏錢（有當然好），而是自己刨完公開貼的馬匹跑出，尤其中正冷嘢，所感到的興奮，非筆墨所能形容。
上周日跑經典一哩賽，小弟只畀兩隻——「美麗星辰」及「晒冷」，臨場分別為七點八倍及二十倍。結果？級制賽冷殺手巴度又嚟料，「隊」入Q，「美麗星辰」則第三，兩匹輸比「小鳥天堂」，無話可說，因後者露出「神獸」真面目，竟可彈離所有馬匹兩個馬位，而起動點竟只在最後二百米，似乎另一匹「金鎗六十」誕生了。
究竟潘頓賽後會否抌心抌肺呢？因呢場所有實力馬，幾乎任佢揀，而佢揀咗「睿盛人生」，只跑第四，失去幾十萬元獎金外，更失埋「小鳥天堂」的策騎權，因丁冠豪應該冇咁衰仔，何澤堯替佢贏完後，就飛起堯仔嘅。
說來呢場賽事也見到何澤堯的膽識及卡士，因入直路後，前面馬似一堵牆，根本冇位上，而佢竟可冷靜又精準地，在最後300米見到一個空位，立即撬開左右馬匹殺上，一跑順，「小鳥天堂」原來有炮彈式爆炸力。
好嘞，講返小弟貼士，兩隻位置Q派198元，我又可以歡歡喜喜來頓豐富粉麵餐喇。
開完一次砂糖之後，今晚貼士會否開Z呢？相信唔會了！因小弟相當有信心今晚「黑夜之神」方嘉柏會發威了。
睇佢嗰陣，放出兩隻超班馬「相映紅」及「好好戀愛」做纜躉，大家可以W、P過關。然後有三隻邊線馬也可入Q或P，包括「棒棒糖」、「寶賢得得」及「哥倫布」。
好！一於用以上五馬匹過關，P五串十一啦，極度可能會食大茶飯，鋸鮑魚！