幾十年前的電台，有一種非常受歡迎的節目形式——點唱。
正所謂有得你揀，才算老闆。聽眾就是老闆，若果冇咗佢哋，分分鐘冇糧出兼份工冇埋，故此就晒佢哋，喜歡點乜，DJ就播，鎖住一班擁躉，日日追聽。
咁點解呢種形式今時今日瓜直？正是拜科技所賜。昔日聽眾十之八九非常清貧，邊有餘錢買唱片及唱機？小弟童年，也是老父死慳死抵，才買到一個古老轉盤，播放唱片。
但能負擔的唱片，就只得最流行的三幾隻，例如方逸華的《花月佳期》及潘迪華的《Ding Dong Song》（有冇年輕聽眾知係乜東東？）等膾炙人口名曲。
普通樂迷冇可能日日夜夜只聽住兩首歌，於是就要靠聽電台。所有年代經典金曲，包括最新最流行的，電台永遠第一時間有齊（唱片公司利用電台免費宣傳），如此，當然盡收天下樂迷。
做點唱，最犀利為DJ之父Uncle Ray，一做就幾十年，直至佢離世。
今日為乜講點唱？因現今身處珠海一間五星級酒店「海灣大酒店」，除所有設備齊晒之外，更過癮，一踏入房，見床上有個枕頭仔，上面布滿密密麻麻的字。
當然好奇，立即睇睇係乜。咦，過癮喎，原來此酒店提供「枕頭點唱」！
佢哋有八款不同款硬度、味道及健康養生效能的枕頭，供客人選擇，包括：一、茶葉枕；二、蕎麥枕；三、麥飯石枕；四、薰衣草枕；五、乳膠枕；六、太空記憶枕（唔知有冇作大，話可以配合你頭形，以舒緩肌肉壓力）；七、決明子枕；八、孕婦枕（舒適U形，為懷孕及哺乳期間女士而設）。
係咪好過癮？得唔得難講，勝在「你有選擇權」。