曾智華
嘻嘻嘻，嘻嘻嘻！
本欄每周兩次賽馬發放山埃，得唔得，捧場讀者自然心裏有數，有幾多次中、有幾多次瞓街、有幾多次贏咗得啖笑⋯⋯上周日收穫175元，各位，夠你有乜享受呢？
小弟當然雙重享受，一是真金白銀派彩，但更重要係心靈上的大滿足，覺得自己有眼光，又可益到各位，好開心㗎！
上周日點解贏？重溫吓啦。長年的實戰經驗（其實普通料），第一，跑馬絕少開熱門Q；第二，凡有一隻贏硬的，就是圈內人的「開飯賽」，即贏硬的照贏，而二三四熱就縮，然後，劇本係「隊」隻大冷做腳，咁就皆大歡喜嘞（幕後人咋）。
上周日兩隻必贏，一為「嘉應高昇」，二為「浪漫勇士」，皆世界級馬王，唔衰得，也唔輸得，故此，大家可以「開飯」嘞。
小弟清楚指出，買兩場Q必須飛起二三熱，如此，僅100大元投注已掂。結果，次熱「遨遊氣泡」在「軟硬鞭」使出軟鞭之下，冇去，但估唔到，佢犀利到可以輸三個幾馬位！即係點？即係要For Sure自己唔好入腳！
見怪不怪，其怪自敗。呢場我隱隱見到班幕後人笑到碌地，互相擊掌大叫Yeah！
今晚繼續開心，小弟專攻研究「黑夜之神」方嘉柏個陣，幾肯定佢會連番出擊，借用可減五磅的徒弟仔黃智弘及大師傅「哈囉文」搏殺。
方廄出馬七匹，最大機會勝出的是「超強六十」，今季出賽四次，經已試準，可在特擅途程一千米賽事郁手喇，纜躉也。
其他有三隻，也可以坐P望W，分別為「賢心聲」、「銀進」及「快靚旺」。
買方仔馬，唔多使睇近績，只研究有冇實力揭竿而起已可，因佢永遠唔食「熱嘢」，最喜歡與馬迷捉迷藏。
