黃庭桄
試問一個人如果經常怨天尤人，自怨自艾，呻到樹葉都落，圍繞在他身邊的，還會有好氣場和正能量嗎？明明有貴人想出手扶持，都會被那股怨氣彈走吧！
那些負能量的人，開口埋口都會習慣說：「我唔得㗎……我實做唔到㗎……我都唔叻，點識噃……我唔夠人哋鬥㗎……我一定會輸……」總之仗還未開打，便率先掟白毛巾投降。如此人生態度，只會跟成功越走越遠，徒剩羨慕的眼神。
你明明別具潛能，只是未有機會發揮出來，但你每一次都慣性潑自己冷水，令你也不敢相信：「我係唔會成功嘅！」鬥志去了哪裏？Power去了哪裏？
看看華人騎師巫顯東，成績一直處於下游，坐騎數量寥寥可數，來季能否成功續牌，還得看他今季成績如何。
他曾經說過：「每一次上場，我都會全力以赴。」我信！馬迷都信！所以當他在上周日策騎「天將龍駒」出賽，便因為人馬合拍，季內曾兩度掄元，被捧成大熱門。
當賽事轉入最後直路時，「天將龍駒」和金誠剛策騎的「盈好威楓」叮噹馬頭，「盈好威楓」甚至一度超越領先，但巫顯東完全沒有放棄，反而更加努力推騎，令「天將龍駒」加速反先，成為第一匹馬衝過終點，為巫顯東增添多一場頭馬。
這正正是鬥志鮮明的表現！如果未出閘便打定輸數，如果被其他馬過頭便放軟手腳，那麼誰會幫你反敗為勝呢？
氣，不要谷，不要嘥，不要洩，也不要勞，一定要自己爭！
