曾智華
不同時代，有不同文化。我有幸經歷又見證。
以前的香港，僱主與員工關係，分得好清楚。商場行純資本主義制度，老細唔使解釋，想炒員工，補足法例規定已掂。
但大機構，尤其涉及公帑的，例如大學、醫院、公共服務公司、公營機構及政府，都會強調做「模範僱主」。意即不會輕易與員工分手，更不會因上司個人喜好而隨時將員工辭退。
員工有錯，有一套機制協助改善，可能調部門，可能安排增值學習，可能有輔導跟進，當然可能凍薪甚至降級，但絕少炒魷，更遑論即炒。
但發展到今天呢？
首先，就算官拜政務司司長，都可以一二三叫你起身就起身，找足數即可。小弟認識的，發覺近年連大學也如是，員工並無犯錯，不解釋原因，話炒就炒。
最高學府乃標榜文化、講道理地方，絕不是私人或商業機構，在今天的香港，也「淪落」至此，令人O嘴。
昨晚與一退休局長級高官G哥晚飯，兩杯後搖搖頭：「碌Sir，官場文化如今變化之快，令人看儍了眼，若昔日我可以咁做，就真係冇晒煩惱啊！」佢講乜？正是講上周最「紅」的人物——特區政府駐天津處主任鄭震生。
G哥指，鄭震生所做的晒命行為，無疑觀感極為不妥，但爆出後，即日話炒就炒，政府作為「模範僱主」，也好似「快狠」了一點。佢在任時，處理過N咁多公務員紀律問題，正當合理一般跟以下步驟處理，以示對大家都公平。
包括：一、停職；二、接受調查；三、當事人可以就指控解釋；四、立下裁決；五、給予上訴機會。
做齊以上五項，全部穩妥才解約，會「靚仔」啲？如今未審先判、未查先罰，G哥認為不太理想。