黃秉華
不是很久之前，香港有幾個朋友，緊皺雙眉望住我說︰「你真係去深圳打邊爐呀？」有乜唔妥？「小心，唔好去僻靜地方，連你個腎劏走去黑市器官市場。」
周末得閒，網上順手一搜，搜到一段不知是「短劇」製作故事，還是真人實錄。發生在英國一個故事，話說有位中年太太氣沖沖拍門，驚動了那位背著鏡頭、操印度口音的博主。
太太問︰「出邊架電動車係你㗎？」「新買的，係咪好靚呢？」「快啲丟咗佢！」「？」「你知唔知呢部係中國電動車，有鏡頭專門監控你，同埋你附近鄰居。」「？？」「我唔係講笑，你千祈唔好累街坊。」
鏡頭所見，真的是中國電動車，大大個車標BYD！我想今夕是何年，仲有咁萌塞嘅老鄉？轉頭想返起「深圳劏腎黨」的流言，我不禁仰天長嘯。何解？舊聞一則︰去年10月BBC報道，比亞迪9月在英國的汽車銷售量為超過一萬一千輛，車廠表示，比亞迪9月在英國銷量按年增加近九倍，英國成為比亞迪在中國以外最大的市場。
印度口音博主不怒反喜，對鄰居太太咭咭聲笑不停，最後對準她以一個大特寫結尾。美國官方都曾經講過，中國製造信唔過，不單利用汽車鏡頭侵犯私隱，關鍵時刻，中國電動汽車可以霎時停擺，造成城市災禍，更加駭人聽聞的是，分分鐘如美國製的BB機，被外國勢力特工用作「貼身」爆炸物，殺害無辜。
我讀得書少，你唔好嚇我，我打算今年買新車的啊。
