馬會為保持香港賽馬事業立足國際頂級水平，除不停鼓勵馬主引入最高質素良駒，更會積極邀請殿堂級練馬師及騎師到港發展。
香港付畀過江龍騎練的條件，極度優厚，理論上唔驚冇人來，更應是件件省鏡貨色，令馬迷一次又一次耳目一新。
結果呢？事實話你知，有錢並不一定引入到頂級貨。練馬師方面，過去幾屆已有個別「過江蟲」成績太差，自動投降，放棄人人以為是金礦的練馬師牌照。
幸而差的去，也有勁的來，早兩季到港的澳洲練馬師廖康銘，今季大放異彩，擺明要問鼎冠軍寶座，絕對可以長期追捧。
另外，今季才開倉的南非練馬師桂福特，也證明馬會冇買錯貨，非常犀利，用季初揸住的低班馬，也可掃下多W多Q多P，令馬主紛紛來投，火速爆倉。
桂福特勝在鬥志鮮明，並揚言有好賠率的馬，全部搏！買佢大熱及半熱馬，尤其是用田泰安或希威森執韁的，可以放心。看來當稍後桂廄新馬殺到時，將更加不得了。
馬會引入的外來練馬師，大都交到貨，但騎師又如何？至今當然被馬迷笑甩牙者，為英國騎師潘大衛，其水蛋程度，可以用驚人來形容。決定請佢來的高層，起碼應用問責兼燉冬菇，難以想像咁渣波的也引入？大佬呀，佢至今騎咗一百二十三場，W仍然是零雞蛋，Q得一隻，是否創咗香港馬壇歷史紀錄呢？點解買錯貨仍次次有得上陣，明日又有兩隻騎，簡直荒謬！
明天兩大馬王「嘉應高昇」及「浪漫勇士」又出，絕對唔會蠱惑，既然贏硬，點會拖二三熱門咁冇味？我兩隻都會投注單式二重彩行頭，放棄拖二三熱門，其他則是全餐，兩場加埋一百大元，應該又有得嗌啩？
